مشهد من إنتخابات إتحاد ملاك الحي ” بالعامية “

كتب : هشام سري

– أستاذ فاهم : منورين يا جماعه و مبسوط إنكم استجبتم لدعوتى عشان نشوف هنعمل إيه فى موضوع انتخابات رئيس اتحاد مُلاك الشارع ده –

مدام ظاظا : كان لازم نيجى مهو اللى بيحصل ده كتير و أوڤر،الراجل اللى اسمه فتوح ده مش لازم يكسب المره دى – زكى زلموكه : الراجل من ساعه ما كسب انتخابات رئيس الشارع اللى فاتت و هو هارينا رسوم و دفع فلوس ، تخيلوا بياخد منى ١٠٠ جنيه فى الشهر رسوم ركنه عربيتى المرسيدس ! –

ابله ناهد : الكلام ده مكانش بيحصل ايام مبروك بيه اللى كان قبله ، ولا يوم من ايامك يا مبروك – زكى زلموكه : الله يمسيه بالخير كان بياخد منى ٢٠ جنيه بس كل شهر

– استاذ ناصح : و فلوس صيانه العمارات اللى بقت الضعف، انا خايف يبدأ يلم مننا فلوس تمن نزول السلم و اضطر اخلى ام محمود مراتى تنزلنى كل يوم بالسبت من البلكونه –

مدام ظاظا: عمال يلم مننا فلوس و يشترى معدات و مكن صيانه و معدات ترميم معرفش هيعمل بيها ايه ؟ بعد ما كنت بدفع ٥٠ جنيه فى الشهر للعماره بقيت بدفع ١٥٠ و اضطريت اخصم ال ١٠٠ الزياده دى من الشغاله –

مصطفى : تخصمى ايه من الشغاله يا مدام ظاظا ؟ انا شايفك جايبه شنط من السوبر ماركت امبارح ييجى ب الفين جنيه ! تضع مدام ظاظا ساقاً على ساق قائلةً بإمتعاض : و هى دى حاجتى لوحدى ؟ دى حاجتى و حاجه كوكو –

زكى زلموكه : كوكو مين – مدام ظاظا : الكلب بتاعى –

ابله سهير : ولا عمرنا شفنا كوكو ده ايام مبروك بيه –

مصطفى : يعنى انتى يا مدام جايبه حاجات ليكى و للكلب بألفين جنيه و زعلانه من ١٠٠ جنيه كل شهر زياده فى رسوم الصيانه – زكى زلموكه : ايوه يا اخى كوكو لازم يتغذى –

مصطفى : و انت كمان يا زكى زعلان انك بتدفع ١٠٠ جنيه فى الشهر ركنه عربيه تمنها مليون جنيه ؟ – ابله ناهد : الله اكبر فى عينك يا اخى ، ولا عمرنا شفنا الحسد ده ايام مبروك بيه –

مصطفى : يا جماعه اتقوا الله بقى ، الراجل استلم الشارع خربان بقاله ٣٠ سنه متعملش فيه حاجه ، جدده و رصفه و منع الحراميه و رمم العمارات اللى كانت هتقع –

استاذ فاهم : انت شكلك كده فتوحاوى – مدام ظاظا : هم عبيد فتوح كل كلامهم كده – مصطفى : انا ماشى و سايبكم ، و حقيقى اتمنى إنكم تتفقوا و تلاقوا حد يترشح و يفيدنا كلنا . …

ينصرف مصطفى مصحوباً باللعنات و يستكمل الباقون الاجتماع . – زكى زلموكه : دلوقتى احنا مش عاوزين نشمت الواد ده و اللى زيه فينا ، لازم نلاقى مرشح يكسب فتوح ، انا هغير العربيه و محتاج مكان اكبر – مدام ظاظا : طب ما حد منكم يترشح و نبدأ نعمله التوكيلات المطلوبه –

ابله ناهد : ولا عمرنا سمعنا عن التوكيلات دى ايام مبروك بيه – استاذ ناصح : انا قررت أترشح يا جماعه – مدام ظاظا : و النبى تتوكس يا خويا ، تترشح ازاى بالفضيحه اللى عملتها من شهرين دى ؟ ناسى لما الدكتوره مديحه قفشتك سارق صباعين زبده كاكاو من الصيدليه و طلعت تجرى وراك فى الشارع

انتفض ناصح واقفا و هو يصرخ : – اشاعات مغرضه مطلعها عليا رجاله فتوح ، هو كان صباع واحد و خدته عشان اجربه فى البيت و بعدين كنت هرجع أحاسب عليه – زكى زلموكه : اقعد يا ناصح خلاص انا اللى هترشح – استاذ فاهم : اهو انت بالذات متنفعش –

زكى زلموكه : ليه ؟ – انت تاجر ملابس داخليه و كلوتات ، الناس كلها هتقعد تقول احنا عارفين هو بيفكر منين و هنبقى مهزقه المنطقه – أبله ناهد : ولا عمرنا سمعنا عن تجاره الكلوتات دى ايام مبروك بيه –

استاذ فاهم : خلاص انا اللى هترشح بس المشكله فى التوكيلات المطلوبه ، لازم تساعدونى نجيب ٢٥ توكيل عشان ينفع أترشح و انا مش هعرف اجيب التوكيلات دى لوحدى … ت

نظر ابله ناهد و مدام ظاظا كل منهم للأخرى –

مدام ظاظا : يعنى انت مش عارف تجيب توكيل من ٢٥ شقه فى شارع فيه ٥ آلاف شقه و عاوز تنزل الانتخابات و تنجح ؟ قومى بينى نمشى يا ناهد انا لازم اروح البيت عشان كوكو لوحده –

ابله ناهد : يلا بينا دول مفيش فيهم امل ، انا هروح أزور مبروك بيه عشان عيان من يوم ما خرج من السجن – زكى زلموكه : انت مجبتلناش حاجه نشربها ليه يا فاهم من ساعه ما قعدنا ؟ –

أستاذ فاهم : كنت لسه هعملكم شاى بس ميعاد نومى جه ، المهم ان الاجتماع ده اثبت ان فتوح راجل ظالم و مظبط الانتخابات دى على مقاسه ، انا رأيى نقاطع –

ناصح : ده أحسن حل ، نقاطع و نتهم الدكتوره مديحه انها هددتنا عشان منترشحش –

” فاهم” : و هى مديحه مالها و مال الانتخابات ، احنا نقاطع و نعلن ده فى مؤتمر حاشد يحضره لفيف من سكان الشارع على سلم محل صلاح المكوجى اللى واخد الناصيه –

زكى زلموكة : و هتجيب اللفيف منين و انت اصلا مش لاقى ٢٠ نَفَر يعملولك توكيلات ! –

“فاهم” : خلاص اهو نقاطع و خلاص – كلهم فى نفس واحد : مقاطعه – زكى زلموكه : هات الشاى بقى يا فاهم – استاذ فاهم : تصبحوا على خير يا جماعه

اضف رد

لن يتم نشر البريد الإلكتروني . الحقول المطلوبة مشار لها بـ *

*

x

‎قد يُعجبك أيضاً

خالد عكاشة يكتب : حتى لا ننسى سيناء .. وسط ضجيج القدس

أسئلة طريق .. بتوقيت سيناء. أمام حادث إرهابي بحجم الهجوم على مسجد قرية الروضة، يلزمنا ...